پاکستان میں الیکٹرک گاڑیوں کی دوڑ شروع، گھروں سے لے کر کاروبار تک چارجنگ انفراسٹرکچر تیزی سے فروغ پا رہا ہے۔
لاہور کے حالیہ آٹو شو نے نہ صرف نئی گاڑیوں کے شوقین افراد کو متوجہ کیا بلکہ الیکٹرک وہیکل (EV) ٹیکنالوجی کی جانب بڑھتے ہوئے رجحان کو بھی اجاگر کیا۔ شو میں پہلی بار مختلف مقامی کمپنیوں نے الیکٹرک کار چارجرز بھی متعارف کرائے، جنہوں نے حاضرین کی خاص توجہ حاصل کی۔ اس موقع پر الباریو انجینیئرنگ کے ساتھ منسلک اقبال اشرف نے میڈیا سے گفتگو میں بتایا:
“ہم پاکستان میں نہ صرف کمرشل بلکہ گھریلو سطح پر بھی الیکٹرک گاڑیوں کے چارجرز انسٹال کر رہے ہیں۔ مقصد یہ ہے کہ صارفین کو سہولت دی جائے تاکہ وہ اپنے گھروں میں بھی بآسانی گاڑی چارج کر سکیں۔”
یہ بیان پاکستان میں EV انفرسٹرکچر کی بڑھتی ہوئی اہمیت کو اجاگر کرتا ہے۔ اس وقت دنیا بھر کی طرح پاکستان میں بھی ماحولیاتی آلودگی کم کرنے اور ایندھن پر انحصار گھٹانے کے لیے الیکٹرک گاڑیوں کو فروغ دینے پر زور دیا جا رہا ہے۔ اس حوالے سے حکومت نے بھی مختلف پالیسیاں مرتب کی ہیں، جن میں EV مینوفیکچررز کو ٹیکس میں چھوٹ اور درآمدات پر سہولتیں شامل ہیں۔
الباریو انجینیئرنگ جیسی کمپنیوں کا میدان میں آنا اس بات کی دلیل ہے کہ نجی شعبہ اس ٹیکنالوجی کو اپنانے میں سنجیدہ ہے۔ کمپنی کا ہدف ہے کہ ملک کے بڑے شہروں میں جدید چارجنگ اسٹیشنز لگائے جائیں، جبکہ گھریلو صارفین کے لیے ایسی ڈیوائسز متعارف کروائی جائیں جو کم بجلی میں مؤثر چارجنگ کی سہولت فراہم کریں۔
ان اقدامات سے نہ صرف روزگار کے مواقع پیدا ہوں گے بلکہ مستقبل میں ایک ماحولیاتی طور پر پائیدار پاکستان کی بنیاد بھی رکھی جا رہی ہے۔
