ربیع الاوّل 1447ھ کے چاند کی رویت کب متوقع ہے؟
ربیع الاوّل کے چاند کی رویت کے لیے مرکزی رویت ہلال کمیٹی کا اہم اجلاس طلب
ماہِ ربیع الاوّل 1447 ہجری کے چاند کی رویت کے حوالے سے مرکزی رویت ہلال کمیٹی نے ایک اہم اجلاس طلب کر لیا ہے، جو 24 اگست 2025 بروز اتوار، شام 6 بجکر 30 منٹ پر اسلام آباد میں وزارتِ مذہبی امور کے دفتر میں منعقد ہوگا۔
اس اجلاس کی صدارت چیئرمین مرکزی رویت ہلال کمیٹی مولانا سید محمد عبد الخبیر آزاد کریں گے، جب کہ دیگر اراکین، ماہرین فلکیات، اور محکمہ موسمیات کے نمائندے بھی شریک ہوں گے۔ اجلاس کا مقصد ربیع الاوّل کے چاند کی شرعی شہادتوں اور سائنسی تجزیوں کی بنیاد پر حتمی فیصلہ کرنا ہے کہ پاکستان میں نئے اسلامی مہینے کا آغاز کب ہوگا۔
اجلاس میں ملک بھر سے موصول ہونے والی شہادتوں کو جمع کیا جائے گا۔ اسی سلسلے میں زونل اور ضلعی رویت ہلال کمیٹیوں کے اجلاس بھی اپنے اپنے علاقوں میں ایک ہی وقت پر منعقد ہوں گے۔ ان مقامی کمیٹیوں کی جانب سے موصول ہونے والی شہادتوں کو مرکزی کمیٹی کے اجلاس میں پیش کیا جائے گا، جہاں ان کی تصدیق اور جانچ پڑتال کے بعد چاند کی رویت یا عدم رویت کا سرکاری اعلان کیا جائے گا۔
محکمہ موسمیات اور فلکیاتی ماہرین کی جانب سے ابتدائی اندازوں کے مطابق، 24 اگست کی شام چاند نظر آنے کے قوی امکانات موجود ہیں، تاہم حتمی فیصلہ چاند کی شرعی رؤیت پر منحصر ہوگا۔
اگر چاند نظر آ گیا تو ماہِ ربیع الاوّل کا آغاز 25 اگست 2025 (پیر) سے ہوگا، اور اسی حساب سے 12 ربیع الاوّل، جو کہ میلاد النبی ﷺ کا دن ہے، 5 ستمبر 2025 (جمعہ) کو منایا جائے گا۔
لیکن اگر چاند نظر نہ آیا تو ماہِ صفر 30 دن کا مکمل ہوگا، اور ربیع الاوّل کا آغاز 26 اگست (منگل) سے ہوگا، جس کے تحت عید میلاد النبی ﷺ 6 ستمبر (ہفتہ) کو ہوگی۔
یہ اجلاس دینی ہم آہنگی، قومی وحدت اور اسلامی شعائر کے احترام کے تحت منعقد ہو رہا ہے، تاکہ پورے ملک میں ایک ہی دن اسلامی مہینے کی ابتدا اور مذہبی تہوار منانے کی روایت برقرار رکھی جا سکے۔
