دنیا بھر میں آج “آرتھ ڈے” منایا جا رہا ہے — ماحولیاتی تحفظ کا عالمی پیغام

دنیا بھر میں آج 22 اپریل کو “آرتھ ڈے” (Earth Day) منایا جا رہا ہے، جس کا مقصد ماحولیاتی تحفظ، زمین کی بہتری اور قدرتی وسائل کے پائیدار استعمال کی اہمیت کو اجاگر کرنا ہے۔ یہ دن ہر سال کروڑوں افراد کو ماحولیاتی چیلنجز کے خلاف عملی اقدامات کی ترغیب دیتا ہے۔

“آرتھ ڈے” کی شروعات 1970 میں امریکہ سے ہوئی تھی، جب ماحولیات سے متعلق شعور اجاگر کرنے کے لیے لاکھوں افراد سڑکوں پر نکلے۔ تب سے یہ دن ایک عالمی تحریک میں بدل چکا ہے، جسے اب دنیا کے 190 سے زائد ممالک میں منایا جاتا ہے۔
اس سال آرتھ ڈے کا مرکزی موضوع ہے: “Planet vs. Plastics”, یعنی زمین بمقابلہ پلاسٹک — جس کا مقصد 2040 تک دنیا میں پلاسٹک کی پیداوار کو 60 فیصد تک کم کرنا ہے۔

ماحولیاتی ماہرین، طلبہ، رضاکار تنظیمیں اور حکومتی ادارے اس دن شجرکاری، صفائی مہمات، آگاہی واکس، ری سائیکلنگ پروجیکٹس اور سیمینارز کے ذریعے ماحول کے تحفظ کے عزم کا اظہار کرتے ہیں۔

پاکستان میں بھی مختلف شہروں میں آرتھ ڈے کے حوالے سے تقریبات منعقد کی جا رہی ہیں، جن کا مقصد عوام میں ماحولیاتی آگاہی پیدا کرنا اور نوجوان نسل کو زمین کی حفاظت کی جانب راغب کرنا ہے