لاہور: پولیس افسر کے بیٹے نے دو خواتین کو قتل کر دیا، علاقہ دہل اٹھا!
لاہور کے علاقے باٹا پور میں دل دہلا دینے والا واقعہ پیش آیا جہاں ایک اے ایس آئی کے بیٹے نے اپنی رشتہ دار خاتون اور اس کی کمسن بیٹی کو فائرنگ کر کے قتل کر دیا۔
پولیس کے مطابق ملزم کی شناخت سجاول کے نام سے ہوئی ہے، جو مقتولین کا قریبی رشتہ دار ہے۔ جاں بحق ہونے والی خواتین کی شناخت نبیلہ اور ان کی 15 سالہ بیٹی زنیشا کے نام سے کی گئی ہے۔ اندوہناک واقعے کے بعد ملزم موقع سے فرار ہو گیا، جبکہ پولیس اور فرانزک ٹیموں نے جائے وقوعہ پر پہنچ کر شواہد اکھٹے کرنا شروع کر دیے ہیں۔
ابتدائی تحقیقات میں یہ بھی سامنے آیا ہے کہ ملزم سجاول کا والد محکمہ پولیس میں اے ایس آئی کے عہدے پر تعینات ہے، جس نے واقعے کو مزید حساس اور توجہ طلب بنا دیا ہے۔
پولیس کا کہنا ہے کہ ملزم کی گرفتاری کے لیے چھاپے مارے جا رہے ہیں اور جلد ہی اسے قانون کی گرفت میں لے لیا جائے گا۔ اس واقعے کے بعد علاقے میں شدید خوف و ہراس پھیل گیا ہے، جبکہ اہلِ علاقہ نے قاتل کی فوری گرفتاری اور سخت سزا کا مطالبہ کیا ہے۔
واقعے نے نہ صرف شہریوں کو ہلا کر رکھ دیا بلکہ پولیس کے اندرونی نظام پر بھی سوالیہ نشان اٹھا دیے ہیں، خاص طور پر جب قاتل کا تعلق براہ راست پولیس خاندان سے ہو۔
مزید تفصیلات کا انتظار ہے، تاہم عوام کی نظریں اس وقت قانون نافذ کرنے والے اداروں پر مرکوز ہیں کہ کیا وہ بااثر خاندان سے تعلق رکھنے والے قاتل کو انصاف کے کٹہرے میں لا سکیں گے یا نہیں۔
