“بھارت کی شورش زدہ ریاست اوڈیشہ میں نکسل باغیوں نے 1.5 ٹن بارود لوٹ کر سیکیورٹی اداروں کی نیندیں اڑا دیں!”
بھارت کی مشرقی ریاست اوڈیشہ میں ایک سنگین سیکیورٹی خطرہ اس وقت پیدا ہو گیا جب 1.5 ٹن دھماکہ خیز مواد ایک اسٹور سے لوٹ لیا گیا۔
بھارتی سیکیورٹی اداروں کے مطابق، اس واردات کے پیچھے بھارت میں سرگرم شورش پسند گروہ، نکسل باغیوں کا ہاتھ ہو سکتا ہے۔ یہ واقعہ ریاست کے کوراپٹ ضلع میں اس وقت پیش آیا جب ایک پرائیویٹ کمپنی کے ذخیرہ شدہ بارود پر مسلح افراد نے دھاوا بولا اور بڑی مقدار میں دھماکہ خیز مواد اپنے ساتھ لے گئے۔
نکسل باغی بھارت کے اندر سرگرم سب سے پرانے اور خطرناک بائیں بازو کے انتہاپسند گروپ ہیں، جو کئی دہائیوں سے بھارتی ریاستوں میں حکومت اور سیکیورٹی اداروں کے خلاف مسلح بغاوت جاری رکھے ہوئے ہیں۔ ان کا سب سے زیادہ اثر چھتیس گڑھ، جھاڑکھنڈ، اوڈیشہ، مہاراشٹرا اور آندھرا پردیش میں ہے۔
بھارتی حکام نے خدشہ ظاہر کیا ہے کہ یہ بارود مستقبل میں کسی بڑے حملے یا تخریبی کارروائی میں استعمال ہو سکتا ہے۔ سیکیورٹی ادارے تیزی سے حرکت میں آ چکے ہیں اور علاقے میں سرچ آپریشنز شروع کر دیے گئے ہیں۔ مقامی پولیس کے مطابق، جائے واردات سے کچھ فاصلے پر باغیوں کے نشانات اور مشکوک حرکات دیکھی گئی ہیں۔
اس واقعے نے بھارتی سیکیورٹی اداروں کی کارکردگی اور شورش زدہ علاقوں میں ریاستی کنٹرول پر سوالات کھڑے کر دیے ہیں۔ تجزیہ کاروں کے مطابق، نکسل باغیوں کے ہاتھ اتنی بڑی مقدار میں دھماکہ خیز مواد لگنا ایک خطرناک پیش رفت ہے، جو آنے والے دنوں میں خطے کے لیے سیکیورٹی خطرات بڑھا سکتی ہے۔
