ایف ایس سی پری میڈیکل کے بعد صرف ایم بی بی ایس نہیں — کئی راہیں، کئی منزلیں
ہمارے معاشرے میں ایف ایس سی پری میڈیکل کا مطلب اکثر صرف اور صرف ایم بی بی ایس سمجھا جاتا ہے، جیسے یہ کسی طالبعلم کا واحد مقدر ہو۔ حالانکہ سچ یہ ہے کہ پری میڈیکل صرف ڈاکٹری کا دروازہ نہیں کھولتا بلکہ اس کے بعد کئی اور شعبے ایسے ہیں جہاں طلبا اپنی صلاحیتوں کے مطابق بہتر مستقبل بنا سکتے ہیں۔
بہت سے طلبا ایسے ہوتے ہیں جو محض والدین یا معاشرتی دباؤ کے باعث ایم بی بی ایس کے پیچھے بھاگتے ہیں، اور جب داخلہ نہیں ملتا تو مایوسی کا شکار ہو جاتے ہیں۔ اصل میں یہ وقت اپنی دلچسپیوں، صلاحیتوں اور موجودہ دور کی ضرورتوں کو مدِنظر رکھتے ہوئے آگے بڑھنے کا ہوتا ہے۔ اگر آپ کو حیاتیات، ماحولیات، نفسیات، بایوٹیکنالوجی، فارمیسی، فزیوتھراپی، نیوٹریشن، میڈیکل لیب ٹیکنالوجی، یا پھر پبلک ہیلتھ جیسے شعبوں میں دلچسپی ہے تو یہ سب آپ کے لیے بہترین آپشنز ہیں۔
سائنس کا مطالعہ صرف بیماریوں کے علاج تک محدود نہیں، بلکہ نئی دریافتوں، تحقیق، سوشل ورک، اور پالیسی سازی جیسے کئی میدان بھی منتظر ہوتے ہیں۔ ضرورت صرف یہ ہے کہ آپ اپنے لیے صحیح راستہ چنیں—جو آپ کی صلاحیتوں، دلچسپی اور معاشرتی ضرورت کے مطابق ہو۔
ایم بی بی ایس ایک باعزت پیشہ ضرور ہے، مگر واحد نہیں۔ اصل کامیابی تب ہے جب آپ وہ کریں جس سے آپ کو سکون اور معاشی خودمختاری دونوں حاصل ہو۔
