عوام کی خدمت، پیپلز پارٹی کی اولین ترجیح – بلاول بھٹو زرداری کا سیلاب متاثرین کے لیے فوری امداد کا مطالبہ۔
چیئرمین پاکستان پیپلز پارٹی، بلاول بھٹو زرداری نے کہا ہے کہ سیلاب سے متاثرہ علاقوں میں فوری ریلیف فراہم کرنے کے لیے انہوں نے وزیراعظم شہباز شریف سے درخواست کی ہے کہ بینظیر انکم سپورٹ پروگرام (BISP) کے ذریعے براہ راست اور فوری امداد متاثرین تک پہنچائی جائے، جس پر وزیراعظم نے مکمل تعاون کی یقین دہانی کرائی ہے۔
ملتان میں پریس کانفرنس سے خطاب کرتے ہوئے بلاول بھٹو نے کہا کہ سیلاب سینٹرل پنجاب کو متاثر کرنے کے بعد اب جنوبی پنجاب، خاص طور پر ملتان کے علاقوں تک پہنچ چکا ہے، جہاں ہزاروں لوگ مشکلات کا شکار ہیں۔ ایسے وقت میں پاکستان پیپلز پارٹی کے نمائندے عوام کے ساتھ کھڑے ہیں اور ہر ممکن مدد فراہم کر رہے ہیں۔
انہوں نے مزید کہا کہ پیپلز پارٹی کا ہمیشہ سے فوکس عوامی فلاح و بہبود رہا ہے، اور قدرتی آفات جیسے سیلاب کے موقع پر بھی پارٹی اپنی روایت کو برقرار رکھتے ہوئے عملی اقدامات کر رہی ہے۔ بلاول بھٹو کا کہنا تھا کہ پارٹی نہ صرف امدادی کاموں میں بھرپور حصہ لے رہی ہے بلکہ حکومت پر بھی دباؤ ڈال رہی ہے کہ متاثرین کو فوری ریلیف فراہم کیا جائے۔
انہوں نے بینظیر انکم سپورٹ پروگرام کو ایک مؤثر اور بااعتماد نظام قرار دیتے ہوئے کہا کہ یہی ایک راستہ ہے جس سے شفاف اور فوری امداد عوام تک پہنچائی جا سکتی ہے۔ بلاول بھٹو نے متعلقہ اداروں اور حکومت سے مطالبہ کیا کہ وہ متاثرہ علاقوں میں ہنگامی بنیادوں پر اقدامات کریں تاکہ لوگوں کی زندگیاں محفوظ بنائی جا سکیں۔
