“دنیا کا پہلا ڈرون جنگی طیارہ مار گرانے کا واقعہ، یوکرین نے روسی طیارہ تباہ کر دیا!”
یوکرین نے پہلی مرتبہ دعویٰ کیا ہے کہ اس نے روسی ایس یو 30 لڑاکا طیارے کو سمندری ڈرون سے فائر کیے گئے میزائل کے ذریعے تباہ کر دیا ہے۔ یوکرینی فوجی انٹیلی جنس ایجنسی “جی یو آر” کے مطابق یہ واقعہ روس کے بحیرہ اسود کے اہم بندرگاہی شہر نووروسیسک کے قریب پیش آیا۔
روئٹرز کے مطابق، “گروپ 13” کی جانب سے جاری بیان میں کہا گیا کہ یہ کارروائی سمندری ڈرون کے ذریعے کی گئی تھی اور یہ دنیائے جنگی تاریخ کا پہلا واقعہ ہے جہاں ایک مسلح ڈرون نے جنگی طیارے کو مار گرایا۔
یوکرین، جو کہ تین سال سے روس کے ساتھ مکمل جنگ میں مصروف ہے اور فوجی و مالی وسائل میں کمزور ہے، نے فضائی اور بحری ڈرون ٹیکنالوجی کو اہم ہتھیار کے طور پر اپنایا ہے۔ یوکرین کے چھوٹے اور کم لاگت والے سمندری ڈرونز نے روسی بحریہ کے لیے بحیرہ اسود میں خطرہ بن کر روسی موجودگی کو مشکل بنا دیا ہے۔
یاد رہے کہ یوکرین نے دسمبر 2024 میں بھی اسی قسم کے سمندری ڈرون کے ذریعے روسی فوجی ہیلی کاپٹر کو تباہ کرنے کا دعویٰ کیا تھا، جس سے یوکرین کی ڈریون ٹیکنالوجی کے میدان میں کامیابیت کی ایک اور مثال سامنے آئی۔
